يا ست العاقلين ..
يالى القمر دق بابك ونادى بعلو صوتة
مش هقبل أعيش تحت إيدك وصوتى يلاقى موتة
عشت فيكي على أد ما عيشت ومحستكيش
ومشيت معاكى ليل ونهار ومشوفتكيش
قافلة بابك على صباعي وبتوجع وأقول آه
ولا حد سامعني ولوسامعني مش هيديني دواه
قالوا الأخ للأخ سند وقوة ودهر يحمي
قلت أنا يوم ما ألاقي دهر يبقى دهري هو نفسي
آه يا ست العاقلين يا راسية جننتيني
وقلت يمكن فى يوم أعقل لقيتك توهتيني
شوفتك فى الصبح عروسة
خدودها من الخجل وردية .
نور الصبح بيخرج منك
وانتى بالابيض فى أبيض مكسيه.
قلت نفسي أكون وأكون وأكون وأكون
ودخلت فيكى وخرجت منك زى منا مجنون
وعشانك يا الى قالوا العقل ميزانك
ِوهمت نفسى بجاهك وجمالك
ولقيت فيكى المليونير فقير
الحرامى وزير..
والتمرجى بشخبير
اه يا ست العاقلين يا راسيه تعبتينى
وحبستى صوتى فى برج عالى وعذبتينى
وأما لاقيتك بتزغرطى
وعليا بتضحكى
قلت خلاص لا هقول اشمعنى ولا ليه ولا آه يانى
انا هاعيش وكفايه عليا ان رجليا شيلانى
من انهارده همشى زي زى أى حد عامل أهبل مبقتش تفرق
ولا هسألك جننتى مين ولا سحبتى مين فى شباكك أصل السؤال يخنق
..
ماشيه بالطول والعرض كأنك جرنتش زمانه
ده انتى لو عرفتى السبب مكنتيش تتمنى تبقى مكانه
حكايتك قصه وحدوتة
غنيتها كتير وقالولى ملتوتة
لكن لحد هنا وكفايه اسمعينى بقى
العمر مش بعزقه ..
أنا مش هفضل احكى حكايتك للناس الغلابة
الحواديت خلص زمانها وابتدى زمن الديابة
وأما تعبت
ومن حكاياتك مليت ..
قلت زهقت
وسكت لما حسيت .
ان لسانى لسه فى بؤى بيتكلم
وطول ما أنا عايش فيكى لسه هتعلم واتألم..
ليست هناك تعليقات:
إرسال تعليق